Fréttir

Frábær frammistaða í Nemakeppni Kornax

Nemakeppni Kornax fór fram í 26. sinn í Hótel- og matvælaskólanum í Kópavogi og lauk henni fimmtudaginn 17. október þegar úrslit voru tilkynnt.

Alls voru 18 nemar skráðir til leiks að þessu sinni og stóðu þeir sig með stakri prýði. Af þeim komust svo sex nemar áfram í úrslitakeppnina og var samkeppnin afar hörð.

Tinna Sædís Ægisdóttir var hlutskörpust að þessu sinni og hreppti fyrsta sæti keppninnar. Silfrið féll til Karenar Lilju Sveinsdóttur en bronsið fékk Kara Sól Ísleifsdóttir.

Umfjöllum og myndir frá keppninni má nálgast á Matarvef mbl.is, hér: https://www.mbl.is/matur/frettir/2024/10/18/tinna_saedis_hreif_med_ser_domarana_alla_leid_a_top/

Þáttur bakaraiðnaðar í menningarsögu Íslands

Saga bakaraiðnaðar er gerð að umfjöllunarefni í pistli Björn Jóns Bragasonar á Eyjunni.

Þar er m.a. fjallað um komu bakaraiðnar til landsins með Bernhöft bakara frá Suður-Jótlandi og mikilvægi þess að standa vörð um fagkröfur iðngreina.

Óhætt er að mæla með lestri pistilsins sem nálgast má hér: dv.is/eyjan.

Nýsveinar í bakaraiðn tóku á móti sveinsbréfum sínum

Þriðjudaginn 17. september sl. fór fram afhending sveinsbréfa til nýsveina á Hótel Nordica við hátíðlega athöfn.

Þar fengu alls 13 nýsveinar í bakaraiðn afhent sveinsbréf sín, en þetta er fjölmennasti hópur nýsveina í greininni síðan árið 2000. 

Sigurður Már Guðjónsson, formaður LABAK og sveinsprófsnefndar, afhenti nýsveinum sveinsbréf sín ásamt viðurkenningu frá LABAK.

Fjölmenn athöfn

Afhending sveinsbréfa var afar fjölmenn að þessu sinni. Alls fengu 223 nýsveinar afhent sveinsbréf sín og voru afhent sveinsbréf í alls 16 mismunandi iðngreinum.

Þar voru auk nýsveina í bakaraiðn nýsveinar í bifreiðasmíði, bifreiðamálun, blikksmíði, framreiðslu, húsgagnabólstrun, húsgagnasmíði, kjötiðn, matreiðslu, málaraiðn, múraraiðn, pípulögnum, stálsmíði, veggfóðrun, dúkalögn og veiðafæratækni.

Fjölmennasti hópurinn voru nýsveinar í húsasmíði en í þeirri grein voru alls 81 sveinsbréf afhent.

Landssamband bakarameistara óskar öllum nýsveinum innilega til hamingju með áfangann og glæstan árangur.

Nánar er fjallað um athöfnina á vef Morgunblaðsins, hér á mbl.is.

Anna Gísladóttir, hússtjórnarkennari er fallin frá

Anna Gísladóttir, hússtjórnarkennari, lést á hjúkrunarheimilinu Skjóli sunnudaginn 25. ágúst sl.

Anna starfaði um árabil hjá Iðnskólanum í Reykjavík við kennslu bóklegra faga fyrir bakara og kjötiðnaðarmenn. Önnu var annt um framþróun iðnmenntunar og uppbyggingu þeirrar öflugu bakarastéttar sem uppi er í dag. Framlag hennar í gegnum árin hefur verið ómetanlegt.

Má því segja hún hafi haldið uppi merkjum föður síns við framþróun iðnnáms og bakarastéttarinnar hér á landi. En faðir hennar, Gísli Ólafsson bakarameistari var lengi vel öflugur félagsmaður í Iðnaðarmannafélagi Reykjavíkur sem hann gekk í á þeim tíma sem umræður um setningu iðnlöggjafar og laga um iðnnám stóð sem hæst, en sú löggjöf var samþykkt árið 1928. Þá sat hann í stjórn Bakarameistarafélags Reykjavíkur í alls 22 ár og þar af 18 ár sem formaður en hann var gerður að heiðursfélaga félagsins og sæmdur gullmerki þess. Þá var hann sæmdur gullmerki Iðnaðarmannafélagsins sem og gullmerkjum félagasamtaka bakarameistara í Finnlandi og Svíþjóð en að auki var hann sæmdur riddarakrossi hinnar íslensku fálkaorðu fyrir framlag sitt til bakarastéttarinnar og iðnmenntunar á Íslandi.

Anna Gísladóttir var alltaf boðin og bún til að leggja sitt af mörkum og tók m.a. þátt í verkefninu „Kaffi bakarans“ sem Landssamband bakarameistara stóð að. Þar gekk hún í störf fyrirsætu og prýddi kaffipoka með meðalbrenndu kaffi frá Mið-Ameríku, eins og sjá má hér að neðan. 

Landssamband bakarameistara vottar fjölskyldu og aðstandendum Önnu dýpstu samúðarkveðjur um leið og þakkað er fyrir dýrmætt framlag hennar til bakarastéttarinnar á Íslandi.